भारतीय सैन्यदलात कार्यरत असलेल्या कर्मचाऱ्याने त्याच्याच पत्नीचा निर्घृणपणे खून केला आहे. धुळ्यात ही घटना घडली असून या घटनेने परिसरात एकच खळबळ उडाली आहे. आरोपीचे नाव कपिल बाळू बागूल असं असून हत्या झालेल्या महिलेचे नाव शारदा आहे. या प्रकरणी पोलिस अधिक तपास करत आहेत.
पश्चिम देवपूर पोलीस ठाण्यात गुन्हा दाखल करण्यात आला असून पोलिसांनी महिलेचा पती, सासू, नणंद आणि पतीची प्रेयसी यांना अटक केली आहे. मिळालेल्या माहितीनुसार, पत्नीने अनैतिक संबंधांना विरोध केला म्हणून पेस्टीसाईडचं इंजेक्शन देऊन पत्नीचा निर्घृणपणे खून केला. पतीचे त्याच्याच कॉलेजमधील एका मुलीसोबत अनैतिक संबंध होते. त्याच्या प्रेमसंबंधांची कुणकुण पत्नी शारदा हिला लागली. तिने त्याच्या प्रेमसंबंधाला विरोध केला. त्यातूनच हा प्रकार घडल्याचे समोर आले आहे.
