मुख्यमंत्री देवेंद्र फडणवीस यांची दिल्लीत केंद्रीय गृहमंत्री अमित शाह यांची भेट झाली. या भेटीबाबत मुख्यमंत्री देवेंद्र फडणवीस यांनी माहिती दिली. देवेंद्र फडणवीस यांनी सांगितले की, सन २००८ मध्ये मुंबईवर झालेल्या २६/११ हल्ल्याच्या आठवणींच्या जखमी प्रत्येक मुंबईकरांच्या मनावर कोरलेल्या आहेत. शेकडो निरपराध्यांचे प्राण घेणाऱ्या या हल्ल्यात महत्त्वाची भूमिका बजावणारा तहव्वूर राणा या दहशतवाद्याला भारताच्या ताब्यात देण्यास अमेरिकी राष्ट्राध्यक्ष डोनाल्ड ट्रम्प यांनी मंजुरी दिली आहे.
२६/११चा अपराधी, मास्टरमाइंड तहव्वूर राणा याच्या प्रत्यार्पणासाठी अमेरिकेने होकार दिला आहे, ही अतिशय आनंदाची बाब आहे. यासाठी अमेरिकी प्रशानसाला तयार करण्यासाठी पंतप्रधान नरेंद्र मोदींचे आभार मानतो. मागच्या काळात आम्ही प्रयत्न करून त्याची ऑनलाइन साक्ष मिळवू शकलो, त्यामुळे पाकिस्तानचा या हल्ल्यातील हात असल्याचे दाखवू शकलो. तो भारताचा अपराधी आहे, त्यामुळे भारताला तो अपराधी म्हणून उपलब्ध झाला पाहिजे. त्याला शिक्षा देता आली पाहिजे, अशी आपली मागणी होती. पंतप्रधान नरेंद्र मोदींनी ती मागणी रेटली आणि तहव्वूर राणाच्या प्रत्यार्पणाला मान्यता मिळाली आहे. २६/११ ला आता खरा न्याय मिळेल, असा विश्वास मुख्यमंत्री देवेंद्र फडणवीस यांनी यावेळी बोलताना व्यक्त केला.
यावेळी पत्रकारांनी देवेंद्र फडणवीस यांना तहव्वूर राणाची सुरक्षा कशी असेल असा प्रश्न विचारला, यावर फडणवीस यांनी कसाबला ठेवले तर तह्हवूर राणालाही ठेवू असे सांगितले. दरम्यान, या बैठकीत महाराष्ट्रातील सुरक्षेबाबातही चर्चा झाल्याचे फडणवीस यांनी सांगितले.
