मराठी अभिनेता तुषार घाडीगावकर यांच्या आकस्मिक निधनाने चित्रपटसृष्टी हादरली आहे. शनिवारी त्याच्या निधनाची बातमी समोर आली, त्यानंतर चित्रपटसृष्टीत शोककळा पसरली आहे. काम न मिळाल्यामुळे तुषारने इतकं टोकाचं पाऊल उचललं अशी चर्चा सोशल मीडियामध्ये सुरु झाली. तुषारच्या जवळच्या मित्र परिवाराने हे कारण चुकीचं असून त्याची अशा पद्धतीची बदनामी करणं थांबवा अशी मागणी केली होती. अखेर पोलिसांच्या तपासात या प्रकरणामागचं खरं कारण समोर आलं आहे.
आता या प्रकरणाच्या पोलिस तपासात एक मोठा खुलासा झाला आहे. मिळालेल्या माहितीनुसार, तुषार गेल्या एक वर्षापासून नैराश्याने ग्रस्त होता आणि दारूच्या व्यसनाचा बळी होता. तसेच तो कौंटुंबिक समस्यांमध्येही अडकला गेला होता. त्याच्या मृत्यूबद्दल अनेक प्रश्न उपस्थित होत आहेत, ज्यांची उत्तरे पोलिस तपासात हळूहळू समोर येत आहेत.
अभिनेता तुषार घाडीगावकर यांचे वयाच्या ३४ व्या वर्षी निधन झाले आहे. सुरुवातीच्या अहवालात तुषारने आत्महत्या केल्याचे म्हटले होते, परंतु आता पोलिस तपासात या प्रकरणाबाबत मोठा खुलासा झाला आहे. तुषार घाडीगावकर यांचे २० जून रोजी निधन झाले. मुंबईतील गोरेगाव पश्चिम येथील त्यांच्या फ्लॅटमध्ये मृतावस्थेत आढळले. राम मंदिर परिसरातील एका खोलीत एक व्यक्ती बेशुद्ध अवस्थेत आढळल्याची माहिती पोलिसांना नियंत्रण कक्षाकडून मिळाली होती. माहितीच्या आधारे पोलिस घटनास्थळी पोहोचले तेव्हा त्यांनी तुषारला ताबडतोब ट्रॉमा केअर सेंटरमध्ये नेले, जिथे डॉक्टरांनी त्याला मृत घोषित केले.
पोलिसांच्या म्हणण्यानुसार, तुषारच्या कुटुंबाने कोणावरही संशय व्यक्त केलेला नाही. तसेच कोणाविरुद्धही तक्रार दाखल केलेली नाही. सध्या या प्रकरणाचा तपास सुरू आहे आणि पोलिस त्याकडे संवेदनशीलतेने पाहत आहेत. तुषारचे जवळचे मित्र असलेले अभिनेता अंकुर विठ्ठलराव वाधवे यांनी सोशल मीडियावर एक भावनिक पोस्ट शेअर करून तुषारच्या मृत्यूची पुष्टी केली. त्यांनी तुषारला एक समर्पित कलाकार आणि संवेदनशील व्यक्ती म्हणून वर्णन केले आणि त्याच्या आत्म्याच्या शांतीसाठी प्रार्थना केली. तुषारच्या अचानक निधनाने मराठी इंडस्ट्रीत शोककळा पसरली आहे. अनेक कलाकार आणि चाहत्यांनी सोशल मीडियाद्वारे आपले दुःख व्यक्त केले आहे आणि मानसिक आरोग्याबाबत जागरूकता निर्माण करण्याची गरज देखील अधोरेखित केली आहे.
