स्टॅण्डअप कॉमेडिअन कुणाल कामराने विवादित विडंबन गाण्यानंतर आज (२८ मार्च) मद्रास उच्च न्यायालयात धाव घेतली असून अटकपूर्व जामिनासाठी अर्ज केला आहे.
कुणाल कामराने उपमुख्यमंत्री एकनाथ शिंदे यांच्यावर विडंबनात्मक गाणं सादर केल्याने राज्याचं राजकारण चांगलंच तापल्याचं पाहायला मिळालं. मुख्यमंत्री देवेंद्र फडणवीस यांनी देखील यावर भाष्य करत कारवाई करण्याचे संकेत दिले होते. तसेच कुणाल कामराच्या गाण्यावरील वादावार राजकीय वर्तुळातून अनेकांच्या प्रतिक्रिया देखील समोर आल्याचं पाहायला मिळालं होतं. यानंतर मुंबई पोलिसांनी कुणाल कामराच्या विरोधात गुन्हा दाखल केला होता. तसेच चौकशीसाठी कुणाल कामराला नोटीस देखील बजावण्यात आल्याची माहिती समोर आली होती.
दरम्यान, यानंतर कुणाल कामराने मद्रास उच्च न्यायालयात ट्रान्झिट अॅन्स्टिपेट्री जामिनासाठी अर्ज केला केला असल्याची माहिती समोर आली आहे. या संदर्भातील वृत्त इंडियन एक्सप्रेसने दिलं आहे. तसेच या प्रकरणातील चौकशी दरम्यान अटकेपासून संरक्षण मिळण्याची मागणी देखील कुणाल कामराने मद्रास उच्च न्यायालयात दाखल केलेल्या याचिकेत केली असल्याचं वृत्तात म्हटलं आहे.
