मुंबई क्रिकेट असोसिएशनने गुरुवार 31 जुलै रोजी एक मोठी घोषणा केली आहे. काही महिन्यांपूर्वी एमसीए मुंबईच्या वानखेडे स्टेडियमवर मास्टरब्लास्टर सचिन तेंडुलकरचा पुतळा उभारण्यात आला होता. आता या स्टेडियमवर माजी क्रिकेटर आणि भारतीय कर्णधार राहिलेल्या सुनील गावसकर यांचा पुतळा उभारण्यात येणार आहे. एमसीएने स्वतः याबाबत माहिती दिली आहे. गावसकरांसोबत बीसीसीआयचे माजी अध्यक्ष शरद पवार यांचा देखील पुतळा येथे उभारण्यात येणार आहे.
मुंबईच्या वानखेडे स्टेडियमवर एक क्रिकेट म्यूजियम बनवलं जात आहे. ज्याचं नाव एमसीए शरद पवार क्रिकेट म्यूजियम ठेवण्यात आलं असून याच उदघाटन ऑगस्ट महिन्याच्या शेवटच्या आठवड्यात होऊ शकतं. सुनील गावसकर यांचा पुतळा या म्यूजियमवर ठेवला जाणार असून याशिवाय बीसीसीआयचे आणि एमसीएचे माजी अध्यक्ष राहिलेल्या शरद पवारांचा पुतळा सुद्धा याच म्यूजियममध्ये ठेवला जाणार आहे.
