मुंबई व पुण्यासारख्या शहरांमध्ये रस्त्यांचे काम व मेट्रोचे काम मोठ्या प्रमाणात सुरु आहे. यामुळे नागरिकांची एका बाजूला गैरसोय होत आहे. तर गावांमध्ये मात्र रस्त्यांची अशरक्षः दुराव्यस्था झाली आहे. भोर तालुक्यातील रस्त्यांची देखील बोळवण झाली आहे. यामुळे खासदार सुप्रिया सुळे या आंदोलनला बसल्या. भर उन्हामध्ये डोक्यावर पदर घेऊन खासदार सुळे या पुणे जिल्हाधिकारी कार्यालयाबाहेर आंदोलन केले.
भोर तालुक्यातील श्री क्षेत्र बनेश्वर येथील रस्त्याची मोठ्या प्रमाणात दुरावस्था झाली आहे. यामुळे खासदार सुप्रिया सुळे यांनी आज जिल्हाधिकारी कार्यालयासमोर बसून उपोषण सुरू केले आहे. बनेश्वर फाटा ते वनविभाग कमान या देवस्थानाकडे जाणाऱ्या रस्त्याचे क्राँक्रिटीकरण करण्याची मागणी केली आहे. अनेकदा पाठपुरवठा करुन देखील हे काम केले जात नसल्यामुळे खासदार सुळे यांनी आंदोलनाची वाट धरली आहे. प्रशासनाकडून केवळ आश्वासने दिली जात असून प्रत्यक्षात मात्र कामाला सुरुवात केली जात नाहीये. यामुळे देवस्थानाला भेट द्यायला येणाऱ्या पर्यटकांची आणि भाविकांची मोठी गैरसोय होत आहे.
यावेळी सुप्रिया सुळे यांनी माध्यमांशी संवाद साधला. त्या म्हणाल्या की, क्षेत्र बनेश्वर देवस्थान हे अनेकांच्या आस्थेचा प्रश्न आहे. हा केवळ दीड किलोमीटरचा रस्ता आहे. आम्ही अनेकदा हा रस्ता नीट करावा किंवा त्याची डागडुजी तरी करावी. मात्र प्रशासनाकडून हा PMRDA चा प्लॅन आहे असे सांगितले जाते. मात्र तो 800 कोटीचा प्लॅन आमच्या पदरी कधी पडणार. या दीड किलोमीटरच्या रस्त्यासाठी आम्ही वणवण फिरत आहोत. सगळी शासकीय कार्यालये झाली. मात्र तरी हा रस्ता प्रशासनाकडून करुन दिला जात नाही, अशी तक्रार खासदार सुप्रिया सुळे यांनी व्यक्त केली आहे. तसेच जोपर्यंत कामाचे वर्क ऑर्डर निघत नाही, तोपर्यंत मी उपोषणावर ठाम राहणार आहे. सध्या ऊन वाढत चाललं आहे. मी अन्न खाणार नाही, असा आक्रमक पवित्रा खासदार सुळे यांनी घेतला आहे.
