कुणाल कामरा येत्या ३१ मार्च रोजी मुंबई पोलिसांच्या चौकशीला सामोरा जाणार आहे. याबद्दल शिवसेनेचे ठाकरे गटाचे खासदार संजय राऊत यांना विचारण्यात आलं की तुमचा कुणाल कामराशी संपर्क आहे का? त्यावर राऊत म्हणाले, “संपर्क नसायला तो अतिरेकी आहे का? किंवा तो देशद्रोही आहे का? तो अल-कायदा या दहशतवादी संघटनेचा सदस्य आहे का?”
एका बाजूला शिवसेना गटाचे नेते आरोप करत आहेत की कुणाल कामराने ठाकरे गटाच्या सांगण्यावरून अथवा आदेशावरून उपमुख्यमंत्री एकनाथ शिंदे यांच्यावर टीका केली. अशातच, “माझं कुणाल कामराशी काल बोलणं झालं आहे”, असं वक्तव्य संजय राऊत यांनी केलं. यावरून प्रसारमाध्यमांच्या प्रतिनिधींनी राऊत यांना विचारलं की तुमची मिलिभगत असल्याचा आरोप होतोय, त्याबाद्दल काय सांगाल? यावर राऊत म्हणाले, “कुणाल कामरा हा या देशातील एक कलाकार, कवी व लेखक आहे आणि एकनाथ शिंदे यांचा कुणाल कामरावर आक्षेप म्हणून आम्ही त्याच्याशी बोलायचं नाही का?”
संजय राऊत म्हणाले, “एकनाथ शिंदे यांचे कोणाकोणाबरोबर फोटो आहेत ते मी बाहेर काढू का? मुळात कुणाल कामरा हा काही देशद्रोही किंवा दहशतवादी आहे का? तो फुटीरतावादी आहे का? किंवा तो शिंदेंसारखा बेईमान किंवा गद्दार आहे का? नाही! काल कुणाल कमराशी माझं बोलणं झालं. त्याने मला काही गोष्टी विचारल्या, मी त्याला म्हटलं की आपण कायद्याला सामोरे जायला पाहिजे. हा देश राज्यघटनेवर चालतो, संविधानानुसार चालतो. अभिव्यक्ती स्वातंत्र्याच्या या लढाईत असे हल्ले होत असतात. ते आपल्याला सहन करावे लागतात. आम्ही देखील ते सहन केले आहेत. तुम्ही सुद्धा महाराष्ट्रात येऊन कायदेशीर लढाई लढली पाहिजे.
