मध्य आणि पश्चिम रेल्वेवर शनिवारी आणि रविवारी मेगाब्लॉक घेण्यात येणार आहे. यामध्ये सिग्नल यंत्रणा, रेल्वे रुळांची दुरुस्ती आणि देखभाल तसेच ओव्हर हेड वायर ही अभियांत्रिकी कामे केली जाणार आहेत. पश्चिम रेल्वेवर शनिवारी रात्रकालीन मेगाब्लॉक असणार आहे. तर मध्य रेल्वेवर रविवारी ब्लॉक घेण्यात आला आहे.
पश्चिम रेल्वेच्या सांताक्रूझ ते गोरेगाव या दरम्यान अप जलद आणि पाचव्या मार्गिकेवर मेगाब्लॉक घेण्यात आला आहे. हा ब्लॉक शनिवारी रात्री १२.३० वाजता सुरु होणार असून ते रविवारी पहाटे ४ वाजताच्या दरम्यान बंद होईल. या ब्लॉकच्या वेळेत गोरेगाव-माहीम रेल्वे स्थानकांदरम्यान अप जलद मार्गावरील सर्व लोकल या धीम्या मार्गावर चालवण्यात येतील.
मध्य रेल्वेवर विद्याविहार ते ठाणे दरम्यान पाचव्या आणि सहाव्या मार्गावर हा मेगाब्लॉक असणार आहे. रविवारी सकाळी ८ ते दुपारी १.३० मिनिटांपर्यंत हा ब्लॉक असणार आहे. या दरम्यान पाचव्या आणि सहाव्या मार्गावरील सर्व वाहतूक ही डाऊन जलद मार्गावर वळवण्यात येणार आहे. त्यामुळे या कालावधीत काही प्रमाणात लोकल सेवा विस्कळीत होऊ शकतात.
