राष्ट्रवादी काँग्रेस शरद पवार गटामध्ये लवकरच मोठे फेरबदल होण्याची शक्यता आहे. पक्षाच्या प्रदेशाध्यक्षपदी सुनील भुसारा यांची वर्णी लागण्याची शक्यता आहे. विद्यमान प्रदेशाध्यक्ष जयंत पाटील यांना विश्वासात घेऊनच फेरबदल होत असल्याची माहिती मिळालेली आहे. तसंच, आमदार रोहित पवार यांच्याकडेही महत्त्वाचे पद दिले जाईल, अशी शक्यता वर्तवण्यात येत आहे.
मिळालेल्या माहितीनुसार, युवक प्रदेशाध्यक्षपदासाठी रोहित पाटील यांना सनदी दिली जाऊ शकते अशी माहिती आहे. रोहित पवार यांच्याकडे संघटनात्मक सरचिटणीस पदाची जबाबदारी दिली जाऊ शकते. मुंबईतील आठवडाभराच्या बैठकांनंतर संभाव्य पदाधिकाऱ्यांची यादीही निश्चित झाली असून शरद पवारांच्या होकारानंतर घोषणा होण्याची शक्यता आहे. तसेच पक्षातील ज्येष्ठ नेत्यांकडे विभागवार प्रभारीपदे वाटून दिली जाणार आहेत.
गेल्या आठवड्याभरापासून शरद पवार आणि सुप्रिया सुळे या मुंबईत होत्या. तेव्हा या सर्व गुप्त बैठका झाल्या होत्या. पक्षातील कोअर टीम या बैठकीला उपस्थित होती. तेव्हा या सगळ्या चर्चा झाल्या. गेल्या दोन महिन्यांपासून जयंत पाटील सातत्याने बोलताना दिसत होते की मला थोडा बदल हवाय. गेल्या आठ वर्षांपासून मी ही जबाबदारी सांभाळतोय, त्यामुळंदेखील हे बदल करण्यात येत आहेत का? असा सवाल उपस्थित होताना दिसतोय.
