सहदेव पेटकर यांनी आज उद्धव ठाकरेंच्या उपस्थितीत शिवसेना उद्धव बाळासाहेब ठाकरे या पक्षात प्रवेश केला. यावेळी उद्धव ठाकरेंनी त्यांचं मनोगत व्यक्त केलं. त्यांनी सहदेव पेटकर यांचे आभार मानले. तसंच शिवसेना एकच आहे, दुसरा पक्ष म्हणजे एसंशि आहे असा पुनरुच्चार करत एकनाथ शिंदे यांना टोला लगावला. तसंच आत्ताचं सरकार थापा मारुन आलं आहे लोकांना आता खरी आपल्या शिवसेनेची गरज आहे असंही उद्धव ठाकरेंनी म्हटलं आहे.
सहदेव पेटकर आज इतक्या जोरात बोलले आहेत की मला काही बोलायची आवश्यकता वाटत नाही. दत्ता यांचं कौतुक करतो कारण ते वाढदिवस असतानाही इथे आले. दत्तांसारखे अनेक शिवसैनिक आहेत जे शिवसेना वाढवण्यासाठी मेहनत करत आहेत. कोकणात एक पाऊल टाका असं मला सांगण्यात आलं पण मी सांगतो एकच पाऊल टाकणार नाही पुन्हा एकदा कोकण पादाक्रांत करेन. कोण मधे येतो बघू. कुणी कसा विजय मिळवला याच्या सुरस कथा बाहेर येऊ लागल्या आहेत. कोकणात या हे जसं तुम्ही सांगत आहात तसा अख्खा महाराष्ट्र, माझे शिवसैनिक, शेतकरी बांधव सगेळ सांगत आहेत की आम्ही फसवलो गेलो. थापा मारुन हे मोकळे झाले आहेत. आत्ता लोकांना आपली खरी गरज आहे. असंही उद्धव ठाकरे म्हणाले.
