उत्तर प्रदेशचे मुख्यमंत्री योगी आदित्यनाथ यांना बॉम्बने उडवून देण्याची धमकी देण्यात आली आहे. या धमकीचा व्हिडिओ सोशल मीडियावरही व्हायरल होत आहे. पोलिसांनी यावर तात्काळ कारवाई करत गुन्हा दाखल करून तपास सुरू केला. धमकीचा हा व्हिडिओ सोशल मीडियावर एका व्हॉट्सॲप ग्रुपमध्ये आला होता. ग्रुप ॲडमिन अभिषेक दुबे यांनी याबाबत तक्रार दाखल केली. सुरुवातीच्या तपासात हा मोबाईल नंबर कासगंजचा असल्याचे सांगितले जात आहे.
दरम्यान गौर पोलीस ठाण्याच्या हद्दीतील जोगिया गावातील रहिवासी अभिषेक कुमार दुबे यांनी पोलिसांकडे यासंदर्भात तक्रार दिली आहे. आपण ‘सनातन धर्म सर्वोपरी’ या नावाने एक व्हॉट्सअ‍ॅप ग्रुप चालवतो. ओपन लिंकद्वारे एक अनोळखी नंबरही ग्रुपमध्ये सहभागी झाला. या नंबरवरून ग्रुपवर एक व्हिडिओ पोस्ट केला गेला आहे. साधारणपणे ११ सेकंदांच्या या व्हिडिओमध्ये दोन लोक बोलताना ऐकू येत आहे. तसेच एक व्यक्ती मुख्यमंत्री योगींना बॉम्बने उडवण्यासंदर्भातत बोलत आहे. तर दुसरा त्याला सहमती दर्शवत आहे. महत्वाचे म्हणजे, या व्हिडिओमध्ये एका व्यक्तीचा चेहराही दिसत आहे.
अभिषेकने पोलिसांना सांगितले की, ज्या नंबरवर व्हिडिओ पोस्ट केला होता त्या नंबरवर फोन करून विचारणा केली असता, त्याने कबूल केले की तो व्हिडिओ त्यानेच बनवला आहे. पोलिसांनी गुन्हा दाखल करून प्रकरणाचा तपास सुरू केला आहे. मुख्यमंत्री योगी यांना अशा प्रकारे धमकी देण्याची ही पहिलीच वेळ नाही. याआधीही सोशल मीडिया प्लॅटफॉर्मवर अनेक वेळा धमक्या मिळाल्या आहेत. बहुतेक प्रकरणांमध्ये प्रकरण गंभीर आढळले नाही. पण धमकी देणाऱ्या व्यक्तीला पकडल्यानंतरच परिस्थिती स्पष्ट होईल.
